UZBEKISTAN , 06 Oktober : Enti kitai diberi peluang dalam ngereja sebarang pengawa, anang kakang ati.Kitai patut ransing nyentukka mujur nyapai juluk ati.
Pia ku atlit gumpal isi malaysia, Buda Anchah ke baru udah mujur bulih penuduk lumur dua ( midul perak ) ba pekit gumpal isi dunya di Tashkent ,Uzbekistan ti berengkah kena 1 nyentuk 7 hari bulan sepuluh tu.
Buda ngarika menua Malaysia bepekit ba pekit gumpal isi ba tikas dunya lalu mujur bulih lumur 2, iya nya mai pulai midul pirak ungkup menua kitaI.
Ku iya mayuh pemar ditapi iya sepemanjai timpuh iya nyikap diri enggau pekit tu.
“ Mayuh penanggul mega lebuh aku nyendiaka diri deka bepekit laban kitai semua bela nemu kitai diatu benung napi pandemik Covid-19. Gym mayuh tutup. Nyadi aku ngambi inisiatif aku empu, iya nya nginjau kereban gym ari kaban ke bisi lalu dibai ke rumah dikena aku belatih kediri di rumah”, ku iya.
Nangkan ke nya ku iya, pekara ke patut bisi ba sesiku atlit iya nya ulah tauka disiplin maya belatih, enggau nyaga pemakai.
Iya madahka sukung baik iya ari diri sebilik, kaban enggau gerempung-gerempung perintah enggau ukai dikuasa perintah mega ulih nyadika peransang lebuh bepekit.
Buda madahka tu siti peluang ke manah laban iya ukai semina bepekit ungkup diri empu aja tang mega mai nama menua Malaysia lebih agi nama Sarawak.
Tajapan napi pemar lebuh besemekih enggau pemekit ari menua bukai berindik ari dunya diatu benung napi pandemik covid-19 tang Buda pechaya iya ulih mai pulai midul ungkup menua Malaysia.
“ Aku nyikap diri ambis nadai lima bulan dikena nyikap diri enggau bepekit. Diatu aku mujur bulih penuduk lumur dua dalam kategori 70 kilo sereta bulih penuduk lumur dua dalam kategori master 40 taun nyentuk ke 49 taun, baruh berat 80 kilo”, ku iya lebuh dikerandau pemberita TVS sehari tu tadi.
Enggau nya Buda meri besai terima kasih ngagai perintah menua Sarawak lebih agi Sapit Kepala Menteri Sarawak Datuk Amar Douglas Uggah Embas, Opis Menteri Nembiak Enggau Lumba Dato Abdul Karim Rahman Hamzah, Datuk Snowdan Lawan, Sarawak Sport Cooperation Dr Ong Kee See sereta raban ke bukai laban ke udah mayuh nyaup iya sekumbang udah ngambi bagi ba mayuh pekit. baik nya raban kaunsil lumba enggau main menua, gerempung main gumpal isi Malaysia, sida sebilik, bala kaban gym sereta rayat ari menua tu.
Buda meransang nembiak rebak baru ngambika anang mudah mantul dalam ngereja sesebengkah pengawa baik iya lumba, tauka main bukai sereta patut ngembuan disiplin tauka ulah ke manah, ngambika pengawa ke dikereja ulih tepantup di bandir.
