KUCHING, 5 Oktober : Bisi 15 iku Peranak Menua Luar Tama Nadai Pemendar (PATI) nguji tama ke Sarawak udah diburu pulai dalam timpuh 1 nyentuk ke 4 hari bulan sepuluh 2021 ke udah ba endur ke bebida.
Ku Jurujaku ari Markas Divisyen Pertama Infantri Malaysia (1 Div) madah,pengawa muru keterubah dipejalaika kena ke 1 hari bulan sepuluh 2021 iya nya hari lima urung pukul 3.50 lemai ba Ladang Akrab, Balai Ringin.
Ba operasyen tu raban Soldadu Darat mujur nangkap 3 iku PATI beurmur entara 19 nyentuk ke 45 taun ti nguji tama ke menua tu.
” Ba operasyen kedua kena ke 2 Hari Bulan Sepuluh 2021, raban soldadu mujur nangkap 4 iku PATI ti berumur entara 22 nyentuk ke 47 taun urung pukul 7.55 malam.
“PATI ke ditangkap tu ngaul siku indu enggau tiga iku lelaki tu nguji tama belalai nengah jalai chit di Lubok Antu udah diburu pulai ngagai menua asal sida, ” ku iya nambah agi.
Kena ke 3 Hari Bulan Sepuluh, bisi 2 iku lelaki ti sama berumur 24 taun mujur ditangkap sereta diburu pulai ba Kampung Padang Pan, Serikin Bau urung pukul 2.23 lemai.
Kelimpah ari nya, operasyen ti keempat udah nangkap enam iku PATI berumur entara 20 nyentuk ke 46 taun ti ngaul siku indu enggau lima lelaki ti nguji tama belalai ngena jalai chit lalu semua sida tu udah diburu pulai.
Semua PATI ke ditangkap sereta diburu pulai dalam timpuh 4 hari tu madahka tuju diri tama ke Sarawak tu iya nya deka ngiga pengawa ba mayuh bengkah sektor lalu asil tasat tetemuka semua sida tu nadai dokumen ke sah.
