SRI AMAN: Gerija di Sarawak udah dikemendar dibuka baru ungkup Minggu Kudus ba baruh fasa 3 Pelin Mulaika Pemanah Menua (PPN) berengkah 1 Oktober 2021.
Vicar Gerija St. Luke Sri Aman, Venerable Archdeacon Jackson Jarau madah, taja pia, pengawa muka gerija dibuka nitihka Standard Atur Pengawa (SOP) ke terit bepelasarka atur ti udah diletakkan Kaunsil Pengelikun Menua (MKN), Komiti Mutarka Penusah Ngenyit Nengeri (JPBN) Sarawak enggau Diocese of Kuching empu dikena nagang pengekai Covid-19.
Gerija St. Luke deka ngatur sembiang Hari Minggu ngena dua chara iya nya sembiang di gerija enggau sembiang nengah ‘live streaming’ ungkup sida ti enda ulih datai ke gerija.
“Enti sema enda gerai, mensia mayuh ulih besembiang ari rumah nitihka ‘live streaming’ ti diatur terus ba gerija,” ku iya pengudah servis sembiang Hari Minggu sehari tu tadi.
Ku iya madah, Gerija St.Luke mega netap penyampau tubuh besembiang ke gerija semina ditaga 50 iku aja, mesti udah divaksin, rejister sebedau tama ke gerija, ngena sengkabung mua engagu nuchi jari ngena ‘sanitizer’, meresi gerija sebedau enggau pengudah servis sembiang.
Sida ti bedau nembuka dua dos vaksin tau nitihka servis sembiang ‘online’ ari rumah.
