KUCHING, 3 Oct: Sarawak kena hari Minggu ngerikodka 1,418 kes positif COVID-19 enggau 12 kes pemati.
Penyampau nya dipeda bisi kurang mimit ari sebedau tu.
Entudika nya, nadai kluster baru diripotka sereta bisi lima kluster udah punas naka hari minggu.
Ku Komiti Mutarka Penusah Ngenyit Negeri (JPBNS) Sarawak madah, kes positif COVID-19 baru ti diripotka kena hari Minggu ngujungka semua kes nambah ngagai 215,576 di serata nengeri.
Ari penyampau kes nya, 99.11 peratus ba baruh kategori 1 enggau 2 lalu 0.78 peratus ba baruh kategori tiga, empat enggau lima.
Kuching mengkang ngerikodka kes pemadu tinggi iya nya 366 kes, ditangkan ke Sibu (146) enggau Miri (130).
Pia mega, Sarawak ngerikodka 12 kes pemati ti ngaul sida ke bisi penyakit raya.
Entudi ke nya, bisi lima buah kluster udah punas iya nya Kluster Semada, Serian, Kluster Nanga Bengap, Lubok Antu, Kluster Simpang Bakun, Bintulu, Kluster Jalai Market, Bau enggau Kluster Warong Metrocity, Kuching.
Kluster ke agi aktif di SARAWAK iya nya 102 kluster.
