KUALA LUMPUR : Opis Menteri Sains, Teknologi enggau Inovasyen (MOSTI) madah naka kediatu nadai varian Mu COVID-19 diripotka ari sekeda sampel ti diambi ba serata menua tu.
Nitihka ripot ari Bernama, Menteri MOSTI Datuk Seri Dr Adham Baha, nengah siti penerang madah, naka 30 September ti udah, bisi 1,312 sampel dianalisis ari konsortium ti nyerangkung tujuh makmal baruh opis nya empu, Opis Menteri Pengerai Malaysia enggau institusi pelajar.
MOSTI madah, semua makmal nya nyengkaum Institut Genom Malaysia (GMI), Institut Pansik Perubat (IMR) enggau Institut Biologi Molekul Perubat Universiti Kebangsaan Malaysia (UMBI), Palan Pansik enggau Pelajar Penyakit Berampit Universiti Malaya (TIDREC-UM), Opis Mikrobiologi Fakulti Perubat UM, Integrative Pharmacogenomics Institute (iPROMISE) Universiti Teknologi MARA sereta Institut Pengerai enggau Perubat Komuniti Universiti Malaysia Sarawak.
Penyampau nya nambah penyampau genom ti dibantai dalam ‘Global Initiative on Sharing All Influenza Data’ (GISAID) ngagai 3,009.
Nengah analisis nya, bisi 1,246 sampel tauka 94.9 peratus varian bansa Delta, 11 sampel varian Beta enggau 55 varian bukai ari sampel ti dipilih Opis Menteri Pengerai (KKM) ari serata menua.
“Varian Delta tu endang ditemu meri empas ti lebih berat, ia nya mandangka taka rampit (infektiviti) ti lebih tinggi sereta ulih nyadi pun kluster baru ba menua tu,” ku MOSTI. – TVS
