KUCHING: Raban Polis Marin (PPM) Wilayah Lima Sarawak mujur ngerampas insap bemacham jenama enggau ai bisa ti beungkus sepenyampau RM800,000 kena 24 September nyin tadi.
Komander nya, ACP Zulfikar Mohd Ghazali madah, raban iya ari unit risik bejalaika peresa ngenyit ‘Op Kontraban’ ba sebuah premis bepalan ba Palan Komersil Tabuan Tranquility.
Ku iya dalam siti penerang, asil peresa tetemuka insap bemacham jenama enggau ai bisa ti dipelabaka dibai belalai sereta nadai chukai.
Pengempu premis maya ditasat mega nadai mantaika sebarang dokumen pemendar naruh enggau ngempu insap sereta ai bisa nya ti nadai chukai kastam.
Berindik ari nya, raban PPM Wilayah Lima Sarawak ngetan siku lelaki nyengkaum ngerampas semua insap enggau ai bisa nya dikena bejalaika pengawa tasat ba baruh Akta Kastam 1967.
Kes diserah ngagai pegawai tasat begian tasat pengawa jai indu Opis Polis Pelilih (IPD) Kuching ngambi ulih bejalaika atur ke patut.
