MIRI: Definisyen pribumi patut diterangka silik lalu masukka rintai bansa enggau etnik pribumi sarawak ba ubah Perlembagaan Artikel 161A(7) ngambika nadai agi disebut bansa ‘lain-lain’.
Kaban Parlimen Sibuti, Lukisman Awang Sauni ngembuan pengarap deka Jatti Miriek dirintai nyadi ras tauka etnik di Sarawak dalam ubah Perlembagaan Artikel 161A (7).
“Jatti Miriek iya nya sebengkah bansa ti pemadu lama di Utara Sarawak enggau mayuh di Bagi Menua Miri enggau Parlimen Miri mega ngambi ari nama etnik Miriek. Pia mega ngenukuka bansa Lun Bawang, Vaie enggau rintai etnik ke deka dibantai Perintah Nengeri Sarawak,” ku iya maya bejuraika intipati Atur Perambu Malaysia Lumpar Ke-12 (RMK12) di Dewan Rakyat kena Hari Dua.
Ku iya, pekara tu endang patut diberi perati laban nya seriris enggau konsep ‘Keluarga Malaysia’ ti dipadahka Menteri Besai Datuk Seri Ismail Sabri Yaakob.
Tu nyengkaum bumiputera nengeri Sabah enggau Sarawak ti ngembuan pupu raban bansa.
Ku iya madah, juluk perintah nengeri Sarawak ti deka ngaga ubah ba definisyen pribumi dalam Perlembagaan Malaysia mandangka Malaysia sebuah menua ti mayuh pupu bansa.
Konsep ‘Keluarga Malaysia’ signifikan enggau ubah Artikel 161A (7) ti ngaku pemayuh etnik di Sarawak.
Berebak enggau nya, ba penutup Atur Pemansang Malaysia Lumpar Ke-12 (RMKk12) ila nadai agi ba pom rasmi perintah nyebut ‘lain-lain’.
Nya alai, Lukisman minta kerejasama semua ngambika ulih ngemujurka etnik di Sarawak tu diaku lalu dirintai dalam definisyen pribumi ba artikel 161A ila.
Ubah pekara tu ila deka meri empas ti positif lebih agi ngagai etnik di Sarawak dalam semua pekara ke bekaul.
