KUCHING, 29 Sept: Tiga iku lelaki bebadi nyawa sepengudah kereta ti ditepan sida ngelantak pun kayu ba Jalai Bako Kuching maya Hari Dua.
Tuai Polis Pelilih Kuching, ACP Ahsmon Bajah, madahka penusah nya nyadi urung pukul 6.39 lemai sepengudah kerita ti ditepan tiga iku lelaki nya tepawah ngagai mua kanan jalai.
“Semua sida ke bebadi tu peranak menua tu lalu kerita ditepan sida tu bansa Proton Gen2 ti ngelantak pun kayu ba pemagi jalai.
Berindik ari nya, raban polis udah ngelawa endur penusah nya nyadi lalu tetemuka semua sida bebadi nyawa ba dia.
“Sida ke bebadi nyawa tu, ia nya deriba ke beumur 26 taun, pisinjir ke duduk ba luan beumur 24 taun enggau pisinjir ke duduk ba belakang, mujur dipansutka raban bomba sepengudah sida tepekul dalam kerita,” ku Ahsmon.
Tubuh tiga iku lelaki ke bebadi nyawa nya udah dibai ngagai Seksyen Forensik Sepital Besai Sarawak ngambi bejalaika atur ti patut.
Kes ditasat ba baruh Seksyen 41 (1) Akta Perengka Pengangkut Jalai 1987.
Polis minta mensia mayuh ke bisi meda penusah nya nyadi meri penerang ngagai Seksyen Tasat enggau Penerit Atur Trafik, Indu Opis Pelilih Kuching tauka betelefon terus ngagai Pegawai Tasat Inspektor Ardy Azwin Jamain ba lumur 016-812 9617. – TVS
