BETONG: Siku indu bakal ba kaki dalam penusah bebadi ba jalai alun lemai hari tiga.
Ku Pegawai Bomba Kanan I Balai Bomba Betong, Henry Jugah madah, indu tu bakal sepengudah kerita Bezza ke dibai iya belantak enggau sebuah Toyota Hilux ke datai ari pasar Spaoh.
Penusah bebadi nyadi ba Jalai Bebuling lalu bomba nerima kangau senentang penusah tu urung pukul 1.47 lemai lalu berengkah bejalaika operasyen nyelamat urung pukul 2 lemai.
“Udah kami nerima kangau telefon senentang penusah nya kami ari BBP Betong terus ngelawa endur nya lalu tepedaka dua buah entukar belantak.
“Nyadi kedua-dua entukar tu belantak ari tunga ke bebida iya nya ari tunga Spaoh enggau Betong,” ku iya madah lebuh ngagai pengarang berita maya Hari Tiga.
Tudah ke mai kerita Bezza ari tunga Pasar Betong nya benama Halieza Gemserin beumur 24 taun lalu indai iya benama Rebayah Jek selamat sereta nadai napi sebarang bakal.
Deriba ke mai Toyota Hilux nya benama Thomas Chagat ke beumur 50 taun mega selamat ba dalam penusah bebadi nya.
Nangkan ke nya, lebuh datai ba endur penusah nyadi, raban bomba nulung ngeluarka tudah ke mengkang ba penuduk deriba sereta terus ditabanka ambulans ke Sepital Betong ngambika diperubat.
Kelimpah ari nya, Kaban Kunsil Nengeri (ADUN) Layar, Gerald Rentap Jabu bisi datai ngesah penusah bebadi di jalai alun nya.
