KUCHING, 29 Sept : Sarawak ngerikodka 2,967 kes positif COVID-19 enggau siti kluster baru kena Hari Tiga.
Ku Komiti Mutarka Penusah Ngenyit Nengeri Sarawak (JPBNS), 99.56 peratus tauka 2,954 ari kes positif tu dalam Kategori Satu enggau Dua lalu 0.44 peratus tauka 13 kes positif ngaul Kategori Tiga, Empat enggau Lima.
JPBNS madahka Kuching ngerikodka kes pemadu tinggi, ia nya 759 kes, ti ditangkanka Miri enggau 307 kes sereta Sibu 295 kes.
Ari penyampau nya, 736 kes Kategori Satu nadai kelai, 2,218 kes Kategori Dua bisi kelai, enam kes Kategori Tiga bisi kena rampit ba lempuang, dua kes Kategori Empat bisi kena rampit ba lempuang sereta begunaka oksigen, lalu lima kes dalam Kategori Lima bisi kena rampit ba lempuang sereta begunaka mesin ‘ventilator’ kena enseput.
Kelimpah ari nya, Sarawak ngerikodka 26 kes pemati dalam timpuh ari 19 ngagai 28 September 2021.
JPBNS madah, semua kes pemati tu ngaul sida ke bisi penyakit baka sakit buah pinggang, darah tinggi sereta penyakit riman, lalu mayuh ari kes pemati tu ngaul orang ke lunggar umur.
Pia mega, JPBNS ngenukuka seiti kluster baru, ia nya Kluster Giam Kuching, ti ngaul kluster komuniti sepengudah 147 iku orang ditetapka positif.
Seiti kluster udah punas, ia nya Kluster Dijih Selangau, ti ngujungka kluster agi aktif ngenyampau 115 iti. – TVS
