KUALA LUMPUR, 29 Sept : Pengawa nyendiaka Automated Teller Machine (ATM) ba menua pesisir bepanggai ngagai raban pengemeran industri bank.
Ku Sapit Menteri Pekara Wang II Yamani Hafez Musa, pekara tu mesti diperatika dulu senentang ungkus nyeruri ATM, sereta tikas penyampau orang ke ngena mesin ATM ba sekeda kandang endur.
“Taja pia, enti ATM tu diguna bendar, perintah deka berunding enggau raban bank ngambika berunding senentang nyendiaka ATM ba endur nya,” ku Yamani.
Iya bejaku munyi nya lebuh nyaut tanya ari Kaban Parlimen Sibuti, Lukanisman Awang Sauni, bekaul enggau langgur nyendiaka mesin ATM kena ngemudahka agi pengidup peranak ba menua pesisir.
Yamani madah, sepengudah menua tu dituntung pandemik COVID-19, perintah berengkah bejalaika insiatif mayar ngena chara elektronik tauka ‘e-pembayaran’, ia nya chara mayar ti nadai ngena mata duit.
“Dalam pemendar ti dikena nambahka akses ngagai sistem wang, mayuh macham chara dikena ngambika mensia mayuh ulih nguna akses ngagai sistem wang. MOF enggau Bank Negara Malaysia meransang mensia mayuh ngena servis wang ti bepelasarkan teknologi enggau digital, baka akses bank ngena chara dalam tali arus sereta e-dompet ti ulih dikena ba sebarang endur enggau selamat,” ku iya nambah agi.
Pekara tu nerima timbal ti manah ari mensia mayuh laban ia ngemudahka chara bebayar, tebal agi dalam sektor perintah. – TVS
