KUCHING, 29 Sept : Bisi 64 iku orang dikompaun ketegal ngelanggar Standard Atur Pengawa (SOP) ia nya nadai ngemeratka seraka fizikal sereta muka kedai lebih ari jam ti ditetap.
Ku Tuai Polis Pelilih Kuching, ACP Ahsmon Bajah, sida ke dikompaun tu nyengkaum 44 iku lelaki enggau 20 iku indu.
“Sida tu dikompaun ba baruh Peraturan 17 (1) enggau 17 (2) Peraturan-Peraturan Pencegahan dan Pengawalan Penyakit Berjangkit (Langkah-langkah Di Dalam Kawasan Tempatan Jangkitan) Pelan Pemulihan Negara 2021 ketegal nadai seraka fizikal sereta premis nya dibuka lebih ari jam ti patut,” ku iya.
Sida tu dikompaun RM1,500 seiku lalu premis kedai udah dikompaun RM10,000 ti ngujungka penyampau kompaun ti diberi maya nya manggai RM104,500.
“Raban polis deka terus mekuhka pengawa matau premis kena nentuka semua nitihka SOP ti udah ditetap,” ku Ahsmon agi. – TVS
