KUALA LUMPUR, 29 Sept : Bisi 186 projek pemansang sereta ngangkat manah tikas sekula repuk di Sarawak udah dikemendarka kenyau ari taun 2019 ngagai taun 2021.
Sapit Menteri Pelajar II, Datuk Mohamad Alamin madah, ungkus semua projek nya ngenyampau RM1.579 bilion.
Iya mega madahka, ari penyampau nya, 75 projek dikemendarka ba taun 2019 ti begunaka ungkus RM827.0 juta.
“Naka 22 September 2021, bisi 29 projek udah tembu digaga, 41 projek benung digaga lalu lima projek benung ba renggat berengkah digaga ti beungkus RM168.45 juta,” ku Alamin.
Iya bejaku munyi nya lebuh nyaut tanya Kaban Parlimen Stampin, Chong Chieng Jen, ke minta Menteri Kanan Pelajar madahka penyampau sekula repuk ti udah diangkat manah tikas sereta digaga baru dalam timpuh entara taun 2019 ngagai taun 2021 sereta status enggau ungkus projek nya diatu.
Nangkanka nya, Sapit Menteri nya ke mega Kaban Parlimen Kimanis madahka 52 projek tu udah dikemendarka ba taun 2020 ti beungkus RM50 juta.
Naka 22 September ti udah, enam projek benung ba renggat digaga, lalu 46 projek ba renggat deka belabuh digaga ti begunaka ungkus RM122,483.
“Ba taun 2021, KPM (Opis Menteri Pelajar Malaysia) udah ngemendarka 59 projek ti beungkus RM402.71 juta. Semua projek benung ba renggat deka berengkah digaga lalu nadai agih belanja ditetapka,” ku iya nambah.
Berebak ari nya, bisi 4,027 iku nembiak sekula bulih pemanah ari 29 projek ngangkat manah tikas sekula repuk ti udah tembu dipejalai.
Kelimpah ari nya, dijangka 32,141 iku nembiak sekula deka nerima pemanah ari 157 projek ti benung digaga sereta deka digaga. – TVS
