BETONG, 28 Sept : Program betuchuk vaksin ungkup nembiak sekula ari SMK St Augustine nerima timbal ti manah ari nembiak sekula sereta apai indai sida.
Kepala pengajar SMK St Augustine, Ujai Sambau, madah bisi 1,017 ari 1,072 iku nembiak tauka 94.87 peratus nembiak SMK St Augustine udah nerima tuchuk vaksin, nyengkaum nembiak Pom Enam.
“Program betuchuk vaksin ungkup nembiak di SMK St Augustine dibagi ngagai dua renggat. Renggat keterubah ngaul nembiak Pom Empat enggau Pom Lima iya nya kena 10 September 2021.
“Renggat kedua ngaul nembiak beumur 13 ngagai 15 taun tauka Pom Satu ngagai Pom Tiga ti berengkah dipejalai kena 27 September 2021,” ku iya.
Ungkup renggat keterubah, bisi 333 ari 340 iku nembiak Pom Empat enggau Pom Lima tauka 99.12 peratus nembiak udah nerima tuchuk vaksin, lalu renggat kedua ngaul 543 ari 595 nembiak Pom Satu, Dua enggau Tiga tauka 91.26 peratus nerima tuchuk vaksin lebuh program nya dipejalai.
Taja pia, sekeda ari nembiak ke bedau nerima tuchuk vaksin tu ketegal benung dikuarantin ba rumah sereta enda bepengerai lebuh program nya dipejalai.
Nangkanka nya, ku Ujai, apai indai mega dipeda meri timbal ti manah senentang program betuchuk vaksin ungkup nembiak sekula tu.
“Lebuh ditanya, apai indai meri timbal ti manah lalu nyukung program tu dipejalaika dikena nyaga pengelikun anak sida. Pengawa tu sigi dianti sida ngambika bala anak sida ulih nerima tuchuk vaksin baka orang bukai,” ku iya.
Naka kediatu, program nya mujur dipejalaika enggau lanchar asil ari sukung apai indai, raban nembiak sereta bala pekereja ke ngatur program nya.
Berindik ari nya, iya ngelalau semua apai indai ngambika enda kakang ati nganjung anak sida ke sekula laban sida udah nerima tuchuk vaksin. – TVS
