KUCHING, 28 Sept : Menteri Besai Malaysia Datuk Seri Ismail Sabri Yaakub belematika peminta Sabah sereta Sarawak ti bekaul enggau Sempekat Malaysia 1963 (MA63) lebuh iya mantaika Langgur Pemansang Malaysia Lumpar Ke-12 (RMK-12).
Iya madahka diri deka naka ulih mutarka isu ti bekaul enggau peminta Sabah sereta Sarawak nundaka isi ti bisi dalam MA63.
RMK-12 meri perati ngagai Sabah sereta Sarawak kena ngerapitka agi kaul ekonomi entara nengeri, wilayah enggau menua pesisir ngambika enda tinggal ari pemansang sereta tau ulih sama bela ngasaika pemansang.
Pengelicha Kanan Sains Politik Enggau Kaul Entara Bansa Fakulti Sains Sosial Enggau Kemanusiaan ba Universiti Malaysia Sarawak (UNIMAS), Dr Neilson Ilan Mersat, madahka penemu ti dipansutka Menteri Besai dalam RMK-12 nyemetak deka ngemansangka menua ti apin tentu mansang baka menua Sabah enggau mega menua Sarawak.
“Nyadi enti kitai beratika ba teras lumur tujuh, ba pun kenang iya, dia iya nyemetak madahka perintah deka nyungkak sereta ngemansangka dua bengkah menua tu. Reti nya tadi, langgur penemu ti dipansutka iya nya siti pekara ti chukup manah sereta madahka utai ti ulih mai penguntung ngagai Sabah enggau Sarawak ba pemansang, lalu langgur ti manah baka tu amat manah, nadai tejanggal sereta ngasuh pemansang nyigang, kelebih agi ba menua kitai di Sarawak,” ku iya.
Berindik ari nya, ku iya, kitai sama bisi awak ngemansangka diri baka menua tauka bansa bukai.
“Lalu penguntung nya ba menua kitai di Sarawak ditu. Munyi ti suah disebut sekalika dikenang kitai. Sarawak enggau Sabah tu endang sigi agi jauh tinggal dalam mayuh bengkah pemansang enti disemaka enggau menua tauka endur bukai di Malaysia. Kitai agi begunaka sekula, ai beresi, sepital pia mega klinik”, ku iya agi.
Nambahka nya, ku Neilson, diatu nembiak belajar begunaka bungkur internet ukai semina ba nengeri tang kelebih agi ba menua pesisir.
“Nyadi aku melaba enti chukup dipejalaika langgur penemu ti baka tu ulih ngansak sereta ulih nyungkak pemansang kelebih agi ngagai bala kitai ke diau di menua pesisir.
“Enggau nya kitai di Sarawak ulih ngasaika pemansang baka orang bukai, enda jauh tinggal ari orang, lalu langgur penemu tu mega deka mai penguntung, sekalika pemanah ngagai ekonomi, rama enggau politik,” ku iya lebuh dikerandau pemberita TVS.
Langgur pemansang tu mega chukup manah, ku iya, laban pekara tu ulih ngurangka penyeranta ngena jalai ti ngangkatka pendiau diri sereta likun ti mega deka mai pemaik sereta politik ti tegap.
Ba penemu Neilson, kitai diatu endang merambu deka idup dalam siti ruang bilik ti dikumbai ‘Keluarga Malaysia’ ulih Menteri Besai Malaysia. – TVS
