KUALA LUMPUR: Opis Menteri Perengka Pengangkut (MOT) enda kala mansutka penerang tauka langgur senentang penetap orang tuai ke beumur lebih 70 taun mesti mulaika lisin deriba sida.
Ku Menteri Perengka Pengangkut, Datuk Seri Dr Wee Ka Siong, pengelandik orang mai kerita ukai bepanggai ba umur, lalu penusah nyadi ba jalai alun ketegal mayuh macham kebuah.
“MOT enda kala meri penetap senentang orang tuai ke beumur lebih 70 taun mesti mulaika lisin deriba sida, laban pengelandik siku-siku deriba enda sebaka. Baka YB Langkawi (Tun Dr Mahathir Mohamad), iya ulih deriba enggau manah. Lebih manah agi ari orang ke biak. Nadai diskriminasi,” ku iya.
Ka Siong madah agi, mayuh ari kes ti dibai ngagai kort ketegal orang mai kerita maya mabuk, lalu sida ke ditemu salah tu ukai semina diukum mata duit, tang mega dijil kena nagang mayuh agi kes nyadi.
“Deriba maya mabuk endang ngembuan risiko ti 13 kali lebih tinggi bebadi ba jalai alun enti dibanding enggau orang deriba bukai. Ba sekeda penusah jalai alun, 80 peratus penusah nya nyadi ketegal penyalah deriba empu, 13 peratus ketegal kerita, lalu tujuh peratus gaya jalai ba endur penusah nyadi,” ku iya nambah agi.
Lebuh ditanya Syed Ibrahim maya Aum Parlimen, Ka Siong madahka kes orang deriba ngelaban arus nyadi ketegal orang ke deriba nya mabuk tauka makai dadah lalu pekara tu chukup ngirauka ati.
Kelimpah ari nya, nitihka data ari Opis Menteri Dalam Nengeri (KDN), statistik penusah jalai alun ngaul penyalah deriba ngelaban arus taun tu, ari bulan Januari ngagai ke diatu, bisi 807 kes, lalu 29 ngaul orang bebadi nyawa, 17 balat bakal, 49 bakal enda balat, lalu 712 pengerusak.
Wee nambah, nitihka pansik penusah jalai alun, tu mayuh agi nyadi ketegal penyilap mensia empu, ke mai kerita lebih ari pengelaju ti dikemendar, deriba lebuh mabuk tauka makai dadah, bekenaka telefon binching maya mai kerita,sereta enda nitihka atur ti udah ditetapka.
Kebuah ti bepun ari mensia tu dibagi ngagai dua pekara, ia nya penemu sereta pengelandik deriba sereta chara tauka adat orang ke deriba nya berunding lebuh mai kerita. – TVS
