KUCHING, 27 Sept : Bisi Standard Atur Pengawa (SOP) baru sepengudah nengeri Sarawak ngalih ngagai Pelin Mulaika Pemanah Menua Fasa 3 ti deka berengkah ari satu hari bulan Sepuluh 2021.
Nitihka penerang Komiti Mutarka Penusah Ngenyit Nengeri (JPBNS) Sarawak, Opis Menteri Kandang Menua Enggau Pengawa Berumah (MLGH) madahka entara sektor dikemendarka buka sepengudah nengeri Sarawak ngalih ngagai fasa PPN ketiga iya nya kedai lumur, spa, palan ngemajika diri, palan siber kafe, kedai nyual barang bemain nembiak mit, enggau palan snuker sereta palan nginti udang.
Nangkanka nya, Sarawak kena hari satu ngerikodka 2,723 kes positif COVID-19 enggau 19 kes pemati.
Entudika nya, bisi dua kluster baru diripotka kena hari Satu ti nyengkaum kluster komuniti enggau kluster palan jil.
Ku JPBNS madah agi, Â kes positif COVID-19 baru ti diripotka kena hari Satu ngujungka semua kes nambah ngagai 201,812 di serata nengeri.
Ari penyampau kes nya, 99.56 peratus ba baruh kategori satu enggau dua lalu 0.44 peratus ba baruh kategori tiga, empat enggau lima.
Kuching mengkang ngerikodka kes pemadu tinggi iya nya 888 kes, ditangkanka Samarahan (249) enggau Miri (249).
Pia mega, Sarawak ngerikodka semilan belas kes pemati ti ngaul sida ke bisi penyakit raya.
Dua kluster baru ti diripotka iya nya Kluster Tembok, Limbang enggau Kluster Melaban, Kuching.
Lapan kluster udah punas iya nya Kluster Sungai Duuh, Serian, Kluster Mega Suai, Subis, Kluster Jalai Johari Sunam, Bintulu, Kluster Kampung Lot, Kuching enggau Kluster Nanga Tekalit, Tatau ketegal nadai ngeripotka kes positif dalam timpuh 28 hari ti udah.
Naka ke diatu, kluster ke agi aktif di Sarawak iya nya sepenyampau 117 kluster.
