KUALA LUMPUR, Sept 27 : Menteri Besai Datuk Seri Ismail Sabri Yaakob madahka pengawa pemansang nengeri Sabah enggau Sarawak terus dikemeratka ba baruh RMK12 seriris enggau komitmen perintah besai ti deka mutarka isu bekait enggau kedua-dua nengeri nya bepelasarka Sempekat Malaysia 1963 (MA63).
Entara pengawa pemansang iya nya nyendiaka infrakstrakcha mensia mayuh, bekaul kuasa gis enggau elekterik, sukut digital enggau pengelikun.
“Strategi sereta inisitiaf dikena negapka pemansang nengeri Sabah enggau Sarawak tu iya nya numbuhka pukul rata KDNK ninting taun nengeri Sabah dijangka niki ba 6.5 peratus enggau nengeri Sarawak iya nya 5.3 peratus dalam timpuh 2021 nyentuk ke 2025,”
“Aku andal kedua-dua nengeri tu bisi ngembuan potensi sereta mayuh pemansut ti ulih diguna enggau penuh,”
Entudika nya, entara pengawa pemansang di Sarawak iya nya Projek Hidroelektrik Baleh di Sarawak disadang tembu ba taun 2025.
Kelimpah ari nya, Kompleks ICQS Tebedu enggau Serikin dikena nentuka Sarawak likun lalu ngerapitka agi ekonomi enggau Kalimantan, Indonesia.
Lalu projek jalai alun ari garis entara menua Ba’Kelalan, Kompleks CIQ nuju ke Lawas deka digaga berengkah ba taun 2022.
Berebak enggau nya, ari sukut pengerai iya nya servis nyaga pengerai deka diangkatmanahka agi sepengudah Sepital Pengajar Universiti Malaysia Sarawak (UNIMAS) sereta bisi 26 buah klinik pengerai deka digaga di nengeri Sabah Enggau Sarawak.
Sebedau tu, RM 4.09 billion udah diberi ngagai Sarawak dikena bejalaika Pelin Sambung Digital Menua (JENDELA) dikena ngangkat manah bungkur akses internet di serata nengeri.
