KUCHING: Apai indai dilalau nentuka anak sida ke beumur 12 nyentuk ke 15 taun nerima tuchuk vaksin nitihka hari bulan enggau jam ke udah ditetapka.
Datuk Bandar Kuching Selatan (MBKS) Datuk Wee Hong Seng madahka, sida mesti mai semua dokumen ke beguna dikena lebuh nurun nerima vaksin dikena nyeliahka sebarang penanggul lebuh ngerejister nerima vaksin.
Iya nyemetak madahka, endang tanggungpengawa apai indai nentuka pengelikun anak sida tejamin ari dirampit igi penyakit COVID-19 seraya meransang anak nerima dua dos vaksin.
“Kitai ke nyadi apai indai endang patut ngemeratka pengelikun anak kitai ari dirampit penyakit COVID-19.
“Enti sema nadai kebuah berat anang mai anak kita pansut tauka ngelawa palan mensia mayuh. Diau aja ba rumah nganti sida udah nerima dua dos vaksin,” ku iya madah lebuh nurun ngemataka program meri vaksin ke diatur ba Palan Meri Vaksin (PPV) Majma ungkup nembiak sekula ke beumur 12 nyentuk ke 15 taun maya Hari Enam.
Beduduk ari nya, Wee madahka nembiak ke ba tikas umur nya mudah dirampit penyakit COVID-19 lalu apai indai patut matau sereta nemu pekara ke nyadi tauka pengawa ti dikereja anak sida.
Tuju Wee nurun ke PPV nya dikena nentuka semua proses meri vaksin nembiak sekula ba dia bejalai enggau lanchar sereta nadai napi sebarang penanggul bukai.
Nembiak sekula ke nerima vaksin ba PPV nya mayuh datai ari SMK Batu Lintang enggau Lodge School ba baruh Opis Kaunsil Mengeri Kuching Selatan.
