BINTULU: Yayasan Sarawak terus chakah mantu nembiak di nengeri tu sekalika meri bantu gari sekula enggau biasiswa tauka skolarship.
Menteri ba Opis Kepala Menteri (Integriti & Ombudsman) Datuk Talib Zulpilip madahka, skolarship deka diberi ngagai nembiak ke patut nerima enda ngira bansa di Sarawak.
Ngambi berita ari UKAS, iya beterima kasih ngagai Chairman Yayasan Sarawak ke mega Kepala Menteri Datuk Patinggi Abang Johari Tun Openg ti deka neruska program enggau bantu skolarship nya.
“Sepengudah nyadi Chairman Yayasan Sarawak Kepala Menteri udah ngubah sempekat enggau nambahka duit turu Yayasan Sarawak,” ku iya madah lebuh bejaku ba dalam Program Nyerahka Baucher Gari Sekula Yayasan Sarawak Taun 2021 DUN Jepak maya hari Lima.
Bisi 499 iku nembiak ari 13 buah sekula ba dalam sitak Kunsil Nengeri (DUN) Jepak nerima bantu Gari Sekula Yayasan Sarawak ti nguna ungkus RM99,800.
Sida ke nerima bantu tu iya nya ari penerima e-Kasih, Orang Timpang Pendiau (OKU), orang Penan, nembiak taun satu enggau pom satu.
Talib ke mega Kaban Kunsil Nengeri (ADUN) Jepak madahka, dalam Skim Yayasan Sarawak nadai orang tinggal nerima bantu sekalika gari sekula tauka nerima skolarship sekula.
“Enti sema begunaka gari sekula, sigi diberi gari sekula. Pia mega, enti begunaka skolarship sekula, sigi deka diberi,” ku iya madah agi.
Talib mega arapka rayat Sarawk lebih agi nembiak sekula ngambi peluang ke diberi nyapai pemujur lalu Yayasan Sarawak nya ungkup semua anak Sarawak.
