KUALA LUMPUR: Menteri Besai Datuk Seri Ismail Sabri Yaakob deka mantaika Pelin Malaysia Lumpar Ke-12 (RMK12) ti deka nyadi pelasar tunga tuju pemansang menua dalam timpuh lima taun ba Dewan Rakyat kena hari satu minggu baru.
Ismail Sabri dijangka mantaika RMK12 bagi timpuh 2021 nyentuk ke 2025 nya pukul 11.30 pagi sepengudah sesi saut tanya lisan.
Pengawa mantaika RMK12 tu diubah dua kali ari hari bulan asal iya nya kena 6 Ogos taun siti nyin kemari ngagai bulan Januari taun tu, lalu deka dibantaika maya hari satu minggu baru.
Tu berindik ari menua agi napi pandemik COVID-19 ba pengujung Pelin Malaysia Lumpar ke-11 (RMK11) enggau perintah besai ke suah berubah.
Beduduk ari nya, setipak enggau rambai jaku Keluarga Malaysia, RMK12 dijangka mekuhka sukut pengelantang enggau nyaga sosial rayat ti nyadi sebagi ari penyungkak ekonomi menua.
Mayuh projek pemansang ti deka dipejalaika ungkup pengelantang rayat ti dibanding enggau projek besai baru.//
Kelimpah ari nya, Menteri ba Opis Menteri Besai (Pekara Ekonomi) Datuk Seri Mustapa Mohamed sebedau tu madahka, pandemik COVID-19 ngubah chura perintah ngagih belanja.
Tebal agi, ngelangkar pemansang menua ti mekuhka pengerembai pasca pandemik dalam timpuh lima taun ti deka datai.
