KUCHING , 25 September : Chara nerima pelanggan, chara nunduk ke pelanggan entara kelai Kuwin Street Burger. Pia ku pengempu pengawa dagang tu iya nya Sangga Ak Empanggau ke beumur 29 taun berasal ari menua Kapit.
Siku agi pengempu Kuwin Street Burger tu iya nya Hellen, ke berasal ari Kuching madahka ninting hari empat sida endang suah ngaga “free ladies night” iya nya meri burger sechara pechuma ngagai pelanggan indu.
“Ninting hari empat kami bisi ngaga “free ladies night”, dikena narit ati pelanggan. Nama kebuah? Laban kami deka meri tanda basa ngagai tetiap iku orang indu di luar nya”, ku iya.
Kuwin Street Burger berengkah beoperasyen ari siti stall tauka kedai ke mit, kenyau ari taun 2017 kena bulan Ogos. Diatu bisi 3 buah stall ke endang chukup aktif.
Sangga madahka Kuwin burger tu dikelala orang mayuh berindik ari mayuh produk ti dikeluarka sida.
“ Kuwin burger tu dikelala orang mayuh berindik ari kami mayuh mansutka produk. Suba kami semina ngaga burger biasa aja tang diatu kami dikelala orang enggau ‘home-made pork burger’ ( burger digaga diri empu ). Entara burger ke chukup tebilang iya nya 3 layer, perut manis enggau mozzarella chesse “, ku iya lebuh dikerandau pemberita TVS.
Nangkan ke nya, seduai iya madahka pekara ti seruran dikenang iya nya niki nurun seduai dalam bejalaika pengawa dagang seduai tu. Seduai madahka diri berasai temegah ati laban ulih nyadi siku ari anak bansa iban ke ulih mujur dalam pengawa dagang baka dagang pemakai baka tu.
Seduai iya meransang mensia mayuh kelebih agi nembiak rebak baru ngambika anang mudah putus pengarap lebuh ngereja sebarang pengawa ke diinginka ati.
