BETONG: Siku lelaki tuai umur ti diripotka lenyau lebuh nangkap ikan di Batu Lintang, Layar pulai selamat lemai hari empat.
Ku Jurujaku Opis Bomba enggau Penyelamat Malaysia (Bomba) Sarawak madah, lelaki nya ke beumur 61 taun enggau Orang Timpang Pendiau (OKU) dipadahka enda pulai kenyau ari 22 September ti ngujungka sida sebilik ngaga ripot polis urung pukul 5.33 lemai kemari.
Berebak ari nya, Pegawai Bomba Kanan Henry Jugah ari Balai Bomba Betong bejalaika Operasyen Ngiga enggau Nyelamat (SAR) tudah.
Henry madahka, operasyen ngiga tudah ke benama Wan Ak Belu dipejalaika begulai enggau peranak ba genturung pendiau dia dalam kandang radius 500 meter ke ulu Sungai Batu Lintang.
“Aku enggau tiga iku raban bomba sereta sida serumah ngiga tudah ngagai endur iya ke bejalai nangkap ikan lalu tetemuka bekau iya lebih kurang 700 meter udah nya kami nadai nemu kini penunga iya,” ku iya madah ngagai pengarang berita TVS malam hari empat.
Ku Henry madah agi, lebuh sida ti nyengkaum tudah sebilik enggau peranak ba rumah panjai baum deka bejalaika SAR ba hari udah nya, tudah datai ngenyit ari dapur bilik sida.
“Kami nyau tekenyit ati enggau gaga ati laban Wan tu pulai ke rumah sida enggau selamat, nadai bisi bakal sereta gerai baka selama.
“Lebuh ditanya, Wan madahka lebuh iya bejalai mukat nyentuk ke datai ba Wong Batu Sg Lintang iya nya alai sida ke suah ngambi ai paip ba penyauh 6 ke 7 KM.
“Iya madahka diri enda ulih pulai laban hari udah malam enggau enda mai lampu pichit. Nya ngujungka tudah tinduk ba tanah betikaika daun ke digumpul iya,” ku Henry nambah.
Kelimpah ari nya, iya nadai ninga nyawa tauka lampu peranak rumah panjai ke benung ngiga sereta deka nyelamatka iya.
Berindik ari nya, bini tudah Likan Embol lantang ati laban laki iya pulai enggau selamat sereta beterima kasih ngagai raban bomba enggau sida ke serumah ke udah sama kiruh ngiga Wan ke lenyau sebedau tu.
