KUALA LUMPUR: Bisi 1,500 pengemeran industri dagang temuai udah bulih setipikit pengasi dikena raban tu bejalaika operasyen dalam norma baru ba baruh Garis Lalau Pengasi enggau Standard Atur Pengawa (SOP) COVID-19 .
Presiden Majlis Dagang Temuai Malaysia Uzaidi Udanis madahka, setipikit ti dikeluarka Perbadanan Produktiviti Malaysia (MPC) iya nya sebuah ejensi ba baruh Opis Menteri Pengawa Dagang Antarabansa enggau Industri nya nyerangkung tujuh sukut dikena nyaga pengelikun temuai.
“Tujuh sukut ti nyerangkung SOP pemindah, operasyen, chara bebayar enggau mesan dalam timpuh setaun tu. Naka ke diatu, bisi 1,500 pengemeran industri dagang temuai udah nerima setipikit tu.
Iya bejaku munyi nya lebuh dirandau ba program Ruang Bicara ti diatur Bernama TV bekaul enggau “Pelancongan Hidup Semula”.
Ku Uziadi madah, setipikit nya mandangka industri dagang temuai udah besedia deka beoperasyen baru sereta ulih meri peluang pengawa enggau mulaika baru pemanah ekonomi menua.
“Ba Langkawi, setipikit ungkup pengemeran industri udah diberi manggai 100 peratus.
“Taja pia, sesiku temuai mega mesti nitihka SOP ke udah ditetapka. Enti sema tepedaka mayuh orang ba sekeda endur, sida mesti nyeliahka diri ari endur ke bededat nya. Giga endur ke bisi seraka fizikal enggau atur ke manah,” ku iya nambah agi.
Kemari Menteri Besai Datuk Seri Ismail Sabri Yaakob madahka, Aum Komiti Khas Pengatur Pandemik setuju ngemendarka senentang muka baru palan penemuai, pulau sereta aktiviti mindah meraka nengeri sepengudah taka program betuchuk vaksin menua manggai 90 peratus rayat besai tuai ti bepelasarka data enggau analisis ke dikeluarka Opis Menteri Pengerai (KKM).
Naka diatu, 80 peratus rayat besai tuai di menua tu udah tembu betuchuk vaksin ba baruh Program Betuchuk Vaksin COVID-19 Menua (PICK).
