KUALA LUMPUR: Opis Menteri Pengerai (KKM) enda agi nguna formula imuniti kelompok ti bepelasarka taka deka nyapai pemadu kurang 80 peratus peranak di menua tu udah dituchuk vaksin dikena nagang pengekai igi penyakit COVID-19.
Ku Menteri Pengerai Khairy Jamaluddin madah, pakar pengerai dunya diatu badu nguna formula nya lalu mekuhka pengawa betuchuk vaksin ngagai mayuh agi populasyen di menua tu ketegal pengekai varian Delta ti ngujungka juluk deka nyapai imuniti kelompok patut lebih ari tikas 80 peratus.
“Aku enda agi nguna leka jaku “herd immunity”. Sebedau kitai berengkah bejalaika program betuchuk vaksin, kitai nguna formula konvensional dikena ngira imuniti kelompok iya nya 80 peratus udah divaksin dikena nyapai imuniti kelompok.
“Tang, pekara nya sebedau pengekai varian Delta. Delta tu mai empas ngagai chara kitai ngira imuniti kelompok lalu enda temu kemaya kitai ulih nyapai imuniti kelompok ti engkeman,” ku iya nambah agi.
Iya bejaku munyi nya lebuh nyaut timbal ari Datuk Seri Ahmad Maslan ti nanya kebuah kes pengekai enggau pemati ketegal COVID-19 mengkang tinggi taja pan 80 peratus peranak ba menua tu udah divaksin.
