KUALA LUMPUR: Opis Menteri Komunikasyen Enggau Multimedia (KKMM) naka ulih deka nentuka akses bungkur internet ti manah di serata menua lebih agi di Sabah enggau Sarawak.
Menteri KKMM, Tan Sri Annuar Musa madah, juluk nya deka dipejalai nengah projek ngaga taba menara telekomunikasyen ke baru, ngemanahka tiang pemanchar telekomunikasyen enggau nyediaka premis bungkur internet satelit.
“Komitmen deka ngemujurka juluk tu iya nya siti komitmen nasional ti besai, enda ulih enda digaga, pekara tu seriris enggau konsep ke diatur opis menteri iya nya ulih ngaul pangan diri ti sebagi ari hak mensia,” ku iya.
Iya mansutka jaku nya nyaut timbal Datuk Azizah Mohd Dun (Bersatu-Beaufort) sentang chara ke diambi dikena nentuka bungkur internet manah di sabah.
Ku iya madah, di Sarawak, bisi 823 menara komunikasyen baru diperambu deka digaga enggau 74 ari nya udah tembu, 1,615 stesyen pemanchar deka diangkat manah ari perambu 3,012 stesyen, 47,223 ari 73,588 premis nerima gentian optik lalu 523 endur agi diperambu deka digaga endur internet satelit.
Di sabah, bisi 538 taba menara telekomunikasyen ke baru diperambu deka digaga enggau 51 udah tembu, 2,041 stesyen pemanchar diangkatmanah ari ke penyampau ke dilanggur 3,500 stesyen, 81,268 ari 251,165 premis ngena gentian optik lalu 138 endur bukai diperambu deka didirika internet satelit.
