KUALA LUMPUR: Status indai peranak menua Malaysia ngadaka anak ba menua luar ti jadi enggau peranak menua luar ke enda bulih status peranak menua tu deka diberi perati ba aum kabinet kena Hari Lima tu.
Ku Menteri Luar Datuk Seri Saifuddin Abdullah madahka, sida ke enda bulih status nyadi rayat menua tu ketegal nadai ditetapka ba dalam Perlembagaan Persekutuan ti ngemendarka pekara nya.
Nya kebuah, iya madahka perintah setuju beratika silik pekara tu ari mayuh macham sukut bekaul isu tu ngambika ulih mutarka isu tu enggau naka pemanah.
“ Kabinet udah mutus ngambika aum pagila ngagauka Luyar Menua Tan Sri Idrus Harun ngambika bela bekunsika penemu sereta chara ke patut dikena mutarka isu tu.
“Isu tu bulih timbal ke manah ari raban kabinet ketegal isu tu endang berat sereta ngaul hak sesiku orang,” ku iya nambah.
Sebedau tu, isu nya dibantaika Menteri Pemansang Orang indu, Ruang Bilik enggau Mensia Mayuh Datuk Seri Rina Mohd Harun.
Pekara tu deka dibai ngambika dipesetuju Majlis Raja-Raja awak bejalaika ubah Perlembagaan nya.
Bepelasarka rikod, kena 9 September ke udah, Kort Tinggi Kuala Lumpur udah mutuska anak ke diadaka rayat Malaysia ti jadi enggau peranak menua luar automatik deka bulih status sah nyadi rayat di nengeri tu.
