ENGKILILI, 23 Sept: Bisi 187 ruang bilik ba baruh Atur Nagang Pemindah (PKPD) di sitak Engkilili nerima bantu pemakai.
Pengawa nyuaka bantu pemakai ari Parti Sa’ati Rayat Sarawak (SUPP) pampang Engkilili tu diarika Komiti Kuasa Kereja Parti SUPP pampang Engkilili, Desmond Sateng Sanjan ti dipejalai bedau lama ti udah.
PKPD tu meri empas ti besai ngagai peranak berindik ari pengekai igi penyakit Covid-19 ti ngujungka peranak napi penanggul bulih penatai pemisi.
“Ketegal PKPD, peranak tusah deka mindah ke kebun enggau bulih penatai pemisi laban ti diau di rumah aja,”ku iya madah maya dirandau pengarang berita sehari tu tadi.
Entara kandang endur ti bejalaika PKPD di pelilih Engkilili iya nya Kampung Melayu Engkilil, Rumah Mangku Sungai Keroh, Rumah Sibat Jelukong, Rumah Shem, Pesangu Skim Skrang, Rumah Alexander aur Bangat enggau Rumah Francis Buyong Baru.
“PKPD mega dipejalai ba Rumah Cherang Lipat Ulu, Rumah Dusie enggau Bukong Bangat, Betong,
Bisi tujuh buah rumah panjai enggau sebuah genturung pendiau bejalaika PKPD tu udah nerima bantu pemakai ke diguna ninting hari dikena ngelempungka tating penusah sida.
Ku iya madah, taja mayuh besai tuai ba baruh PKPD tu udah nerima dua dos vaksin tang iya ngarap semua tetap ngasaika Standard Atur Pengawa (SOP) ke udah ditetapka ke pengelikun diri seraya nagang pengekai igi penyakit Covid-19.
“Aku arap semua kitai nitihka SOP enggau menang ngelaban pandemik Covid-19 tu,” ku iya.
