KUCHING , 22 September : Pemujur Watt Enjup enggau anak iya Darren Mengga ba Pekit Malaysian Championship Performing Arts (MCOPA) nyadika peransang ngagai nembiak rebak baru. Seduai menyanak, ke diberi nama tim “Father And Son” mujur bepekit ba tikas antarabansa.
Ku watt, keterubah iya seduai menyanak bela rindu bemain muzik tu lebuh seduai “jamming” sama ba rumah lebuh maya lepa. Ari nya, seduai iya tebulihka idea numbuhka tim tu lalu enggau orang bepekit.
Seduai menyanak nyereta pekit Worldstar Malaysia ke diatur Mate Management. Pekit MCOPA tu iya nya pekit dikena ngiga orang ke landik baka landik belagu, betanda enggau mayuh macham agi pengelandik seni ke bukai. Pekit tu diatur ninting taun ba selampur Malaysia.
Nya mih pengemun seduai menyanak mujur bulih midul emas, ngarika menua sarawak lalu dipilih tama Worldstar Malaysia, enggau tim Malaysia bepekit ba World Star Road To Hollywood. Watt meransang sida ke nembiak ngambika anang malu ngayanka pengelandik diri.
“Aku ngarapka bisi raban ke ulih beratika sereta mantu seduai menyanak ngambika pejalai seduai iya ke deka bepekit ba tikas antarabansa nya mujur lalu mai pulai nama Malaysia ketebal agi nama Sarawak enggau pengaga ati”, ku iya, lebuh dikerandau pemberita TVS.
Iya meri besai terima kasih ngagai Datuk Snowdan Lawan, Menteri Muda Nembiak Enggau Lumba ke mega Kaban Kunsil Nengeri sitak Balai Ringin laban ke udah beratika pemujur seduai menyanak ke deka bepekit ba tikas dunya.
Nangkan ke nya Jerry Kamit, siku pemain muzik sape berasai temegah ati enggau pemujur Watt Enjup enggau anak iya Darren laban ke udah dipilih ngarika Malaysia dalam Pekit World Championship Performing Arts di Las Vegas, Nevada, United States.
“ Aku berasai temegah ati meda pemujur Watt Enjup enggau anak iya Darren laban ke udah dipilih ngarika menua Malaysia dalam pekit tu. Aku ngarapka seduai iya mujur dalam pekit nya ila lalu ulih numbuhka sejarah ke baru ngarika Malaysia, ketebal agi Sarawak”, ku iya.
Jerry Kamit, iya nya tebilang enggau lagu “sayau pemadu sayau” mega kala bemain sape ba tikas dunya.
Kelimpah ari nya, Hallan Hashim iya nya siku ari tim Sada Borneo mega meri tabi puji enggau pengaga ati ngagai Watt Enjup enggau anak iya ke deka ngarika Malaysia dalam World Championship Performing Arts, ke deka diatur ba taun baru, di California.
Ku iya, tu singkang ke chukup manah dikena ngetan tauka ngenan adat enggau main asal ketebal agi ba tikas dunya.
Hallan ke mega siku ari pemekit ba Asia’s Got Talent madahka tu mai reti kereban muzik ari menua Sarawak chukup dikerinduka orang ari menua bukai.
