KUCHING , 22 September : Enggau pemujur nya, Datuk Snowdan Lawan , iya nya Menteri Muda Nembiak enggau Lumba meri perati ngagai Watt Enjup enggau anak iya Darren Mengga ke deka bepekit ba tikas dunya iya nya di Disneyland, California, Amerika.
Ku Datuk Snowdan, iya meri tabi puji enggau pengaga ati ngagai seduai menyanak laban ke udah mujur bepekit bulih midul emas ba Malaysia Championship Performing Arts enda lama ke udah lalu ngujungka seduai mujur bepekit ba tikas antarabansa.
“Kebuah ku madah baka nya laban nadai mayuh orang bisi pengelandik baka seduai, bepekit ngagai tikas antarabangsa. Nyadi kitai amat gaga, bangga enggau pemujur seduai menyanak”, ku iya.
“Tu ulih nyadi chunto ungkup nembiak rebak baru.Nyadi aku bisi udah berandau enggau iya empu, Watt Enjup madah ngagai iya tau..laban pekit tu begunaka belanja nyadi aku bisi madah ngagai iya tau minta ngagai opis menteri nembiak enggau lumba ba baruh ungkup “dana kreatif”. Tu ulih dikena ngatur seduai iya ngagai pekit tu ila”, ku iya lebuh dikerandau pemberita TVS.
Nangkan ke nya Snowdan mega madahka diri deka mai seduai menyanak betemu lalu pekara tu deka dikenataika ngagai opis menteri dagang temuai, seni enggau main asal sereta opis menteri nembiak enggau lumba.
Enggau nya Snowdan ngarapka seduai menyanak ulih nyadi chunto laban ku iya enti seduai ulih, orang bukai pan tentu ulih.
Sebedau tu ku iya, Jerry Kamit enggau artis ari Sarawak mega udah mujur mai nama menua tu ngagai tikas dunya.
