KUALA LUMPUR: Langgur senentang nurunka rega maksimum Kit Peresa Kediri COVID-19 ngagai ke pemadu baruh mesti dipejalaika ngena chara beratika semua raban sereta enda ulih digaga enggau berumban.
Ku Menteri Pengawa Dagang enggau Pekara Bebelika Barang (KPDNHEP) Datuk Seri Alexander Nanta Linggi madahka, pekara nya mesti digaga enggau chara beratika situasyen menang-menang iya nya nyaga penguna sereta ngambi kira sukut industri ngambika pengeluar sereta orang dagang ulih neruska pengawa dagang sida.
“KPDNHEP deka terus ngatur aum enggau Opis Menteri Pengerai (KKM) sereta ngambi kira semua raban nyengkaum fasiliti, farmasi enggau klinik bekaul enggau ungkus ngeluarka kit nya enggau import, sebedau ngaga pemutus nurunka agi rega kit tu.
Nanta bejaku munyi nya lebuh nyaut tanya Cha Kee Chin Kaban Kunsil Nengeri (ADUN) Rasah bekaul enggau sekalika opis menteri nya deka nurunka agi rega maksimum Kit Peresa Kediri COVID-19 ngena chara bererenggat ari rega siling RM19.90 ti ditetapka diatu ngambika semua raban tebal agi raban B40 ulih meli kit peresa nya.
Nangkanka nya, Cha merambu ngambika rega maksimum kit peresa nya diturunka agi bererenggat berengkah RM15.00 nyentuk ke RM5.00.
Nanta madahka pekara nya patut diberi perati sepengudah berunding enggau semua raban ke bekaul ngambika nadai siku ari raban nya ti kena empas ke enda manah sepengudah pemutus digaga ila.
“Tu siti ari langgur ke manah iya nya nurunka rega kit peresa sereta perengka ke bukai, Opis menteri deka mansik baru semua pekara enggau ngambi kira semua chara ke engkeman ti ngaul semua raban pengemeran industri ngambika nadai siku ari kena empas ke enda manah. KPNHEP deka ngaga pengawa matau ungkup semua perengkaguna tu,” ku iya nambah agi.
Pekara tu nyengkaum rega siling produk ke bukai baka “gun spray” ungkup sanitasyen, ‘pulse oxymeter’ enggau ‘air purifier’ ti mayuh diguna rayat diatu.
Bedau lama ke udah, KPDNHEP netapka rega runchit maksimum ungkup tetiap set kit peresa kediri COVID-19 iya nya RM19.90, lalu rega borong ditetapka RM16.00 kena 5 September 2021.
Berindik ari nya, bisi 2,261 premis udah diperesa ti ngaul 123 premis borong enggau 2,138 premis runchit lalu 10 iti notis udah dikeluarka ngagai raban ke nyual kit lebih ari rega maksimum ti ditetapka.
