KUCHING: Polis ari Indu Opis Polis Pelilih Kuching enggau Seksyen tasat jenayah narkotik IPK Sarawak udah mujur ngerap sebuah banglo di Taman Stutong Indah, Tabuan Jaya Kuching ti nyadi palan endur bejalaika operasyen judi nengah tali arus.
Ku Tuai Polis Pelilih Kuching , ACP Ahsmon Bajah madahka ba pengawa ngerap nya sida udah mujur nangkap lima iku peranak menua luar, empat iku peranak menua tu ti dipechaya nyadi operator palan judi tu.
“Semua sida ke beumur entara 18 nyentuk ke 31 taun tu nerima gaji penyampau RM1500 sebulan sereta bonus bepelasarka peratus untung ke diulih sida.
Nangkan ke nya, Ahsmon madahka semua operator tu ngena chara betelefon ngagai penguna dikena ngelakuka judi tu.
“Operasyen judi tu mega nguna aplikasyen enggau media rama baka Whatsapp, Telegram, Wechat, Skype enggau facebook dikena ngelakuka aktiviti judi tu,” ku Ahsmon nambah agi.
Sida tu mega bejalaika aktiviti nya 24 jam ninting hari kenyau ari enam bulan ke udah lalu asil ari peresa transaksyen tetemuka operasyen tu mujur teulihka lebih RM2,000 ninting hari sereta ulih manggai RM60,000 sebulan.
Raban Polis benung nyidi orang ke ngempu banglo ke endur operasyen nya dipejalaika.
“Raban polis mega udah mujur ngerampas mayuh bengkah perengka guna dikena bejalaika operasyen nya baka 7 unit monitor komputer, 7 unit central processing unit (CPU), 8 iti telefon binching, router, modem, enggau ke bukai.
Kes ditasat ba baruh Seksyen 4(1) (g) Akta Rumah Judi terbuka 1953 ti netapka ukum mata duit enda kurang ari RM5,000 enggau enda lebih ari RM50,000 sereta dijil sepengelama enda lebih ari tiga taun, lalu ukum mata duit enda lebih ari RM5,000 enggau enda lebih ari RM50,000 ungkup tetiap mesin judi ke dirampas.
“Kesemua saspek peranak menua luar ditangkap ba baruh Seksyen 51(5)(B) Akta Imigresen 1959/1963 sepengelama 14 hari berengkah 21 September 2021 nyentuk ke 4 Oktober 2021.
Kesemua saspek direman sepengelama 3 hari berengkah 21 Oktober nyentuk ke 24 September tu.
