MIRI, Sept 21 : Bisi siku nembiak indu ke baruh umur bebadi nyawa pengudah mutosikal ke ditepan iya tepawah di jalai Maigold ti besemak enggau makit Everwin, Senadin lemai kemari.
Ku Tuai Tasat Enggau Penerit Adat Trafik Superintenden Alexson Naga Chabu madah, penusah nya nyadi urung pukul 6.30 lemai lalu tudah ke benama Stephenni James, beumur 16 taun berasal ari pelilih Kapit bebadi nyawa tekala nya.
“Asil tasat tumu tetemuka mutosikal ke ditepan tudah iya nya Honda EX5 ti datai ari Kedai Makai Arena Restauran nuju ke rumah suwa besemak enggau palan penusah nya”
“Lebuh datai ba palan nya, mutosikal tudah dipelabaka tepawah lalu tepelanting ba tengan jalai alun”
Iya madahka, penusah nya ngujungka tudah bakal ba pala lalu ditetapka bebadi ba palan nya ari raban perubat.
Tubuh tudah dianjung ngagai sepital miri kena bejalaika atur ke patut.
Kes nya ditasat ba baruh seksyen 41(1) Akta Perengka Pengangkut Jalai Alun (APJ) 1987.
