SIBU , 21 September : Gerempung Bansa Dayak Sarawak (SDNU) pampang Sibu udah mujur bejalaika pengawa nyadung bantu bakul pemakai ngagai sekeda nembiak dayak ke benung belajar ba sekeda sekula primari enggau sekondari di Sibu.
Program tu diatur ba Akademi Memandu Suria, di Sibu maya hari minggu enggau hari satu tu tadi iya nya kena 19 September 2021 nyentuk 20 September 2021.
Bantu bakul pemakai tu disua enggau chara ‘drive through’ dikena nyaga pengelikun bala komiti SDNU pampang Sibu sereta ungkup pengelikun nembiak sekula tauka apai indai sida iya ke datai ngambi barang nya.
Nangkan ke nya program tu disambung baru maya hari satu lebuh raban komiti nya nganjung bantu bakul pemakai ngagai 3 buah sekula agi di Sibu. Penyampau semua bantu bakul pemakai ke diberi ngagai nembiak sekula dalam kandang 2 hari nya iya nya bisi 178 iti.
Ku Chairman SDNU pampang Sibu Chambai Lindong, bantu tu diberi ngagai 12 buah sekula ke datai ari ruang bilik ke kurang penatai pemisi ke diau di pasar Sibu.
“Batang tuju program tu ku dikena ngelempungka tating penusah ke ditapi nembiak sekula sereta sida sebilik sepemanjai timpuh pandemik COVID-19.
Enggau nya SDNU Sibu meri besai terima kasih ngagai Senator Robert Lau Hui Yew laban ke udah mansutka belanja bagi nyukung program tu, enggau 12 buah sekula di Sibu ke udah mantu dalam ngemujurka pengawa tu. //
Program tu diatur raban komiti SDNU Sibu ti betuaika Chambai Lindong.
