SIBU, 20 Sept: Raban Polis Marin Sibu enggau Sarawak Forestry Corporation (sfc) ngerampas sarang burung layang-layang kira-kira 44.945 kilogram ti berega lebih RM134, 000 dalam operasyen peresa ngenyit ‘Op Khazanah’ di sebuah rumah semak Blacksmith Road di Sibu, empai lama.
Komander Raban Polis Marin Wilayah Lima Sarawak ACP Zulfikar Mohd Ghazali dalam penerang madah, siku lelaki enggau tiga iku indu peranak menua tu ke beumur 28 nyentuk 41 taun udah ditan.
Nangkanka nya, ba operasyen ke sama , bisi dua iku lelaki beumur 33 enggau 59 taun ditan ketegal nadai permit tauka lisin ari ‘kontroler hidupan liar’ bejalaika premis rumah sarang burung ti bepalan ba premis Lurung Permai Barat.
Ku iya madah, semua saspek enggau barang ke dirampas dibai ngagai indu opis pelilih (IPD) Sibu enggau Opis Sarawak Forestry Corporation (SFC) di Wisma Sanyan ngambi ulih bejalaika atur ke patut.
Kes ditasat ba baruh Ordinan Perlindungan Hidupan Liar 1998 lalu enti ditemu salah ulih ditinggang ukum maksimum RM50,000 sereta dijil enda lebih ari lima taun.
