ALOR SETAR, 20 Sept: Pengawa meresa status MySejahtera ba tetiap premis lebih agi ba palan bebelika barang mesti diteritka dikena nyeliahka orang ti ba baruh Perintah Pengawasan Dan Pemerhatian Di Rumah (HSO) enda ke premis tauka kedai.
Menteri Pengerai, Khairy Jamaluddin madahka bisi sekeda ngelanggar pentin HSO keluar maya dalam timpuh kuarantin ditemu nengah aplikasyen MySejahtera sida.
“Dalam seminggu tu aja bisi 523 iku ‘check in’ MySejahtera (ke premis), ke alai sida ti tama tu iya nya positif tauka berisiko tinggi ke diasuh kuarantin di rumah.
“Bisi 18 peratus ari (523) ke ‘check in’ tu nyadi ditemu ba palan bebelika barang, nyadi kitai minta pengempu premis nyaga pintu penama terit agi laban sida (individu kuarantin) ulih tama ketegal sekurit enda meresa manah status Mysejahtera, dilak baka nya aja,” ku iya ba aum media pengudah nemuai seraya kereja enggau aum raban khas tuchuk vaksin Covid-19 (CITF), kemari.
Berebak enggau nya, iya minta tetiap kedai runchit enggau palan bebelika barang meresa status MySejahtera mensi mayuh sebedau dikemendar tama ke premis.
