KUALA LUMPUR, 20 Sept : Bisi 18,453,322 iku tauka 78.8 peratus ari populasyen orang besai tuai di menua tu udah nerima dua dos vaksin COVID-19 naka Hari Minggu.
Nitihka penerang infografik ke dikunsika Komiti Khas Jamin Akses Bekal Vaksin COVID-19 (JKJAV), bisi 93.3 peratus tauka 22,001,266 iku ari populasyen orang besai tuai udah nerima satu dos vaksin.
Nangkanka nya, penyampau tuchuk vaksin ninting hari ngerikodka 219,081 dos vaksin udah diberi ti ngaul 60,773 dos keterubah lalu 158.308 ungkup dos kedua.
Tu nyadika penyampau semua dos vaksin ke udah diberi nengah Program Betuchuk Vaksin COVID-19 menua (PICK) manggai 40, 375, 056 dos.
PICK ti dilancharka kena 24 Februari ke udah dikena nagang pengekai penyakit COVID-19 di menua tu.
Kelimpah ari nya, laman web COVIDNOW enggau GitHub Opis Menteri Pengerai (KKM) madahka bisi 376 kes pemati COVID-19 diripotka naka pukul 11.59 malam 19 September ti nyadika penyampau semua kes pemati di menua tu nambah ngagai 23,443 iku.
Penyampau nya nyengkaum tujuh pemati nintinghari COVID-19 ti dirikodka dalam timpuh 24 jam (19 September) lalu laluh penyampau ke bukai nya kes pemati ba hari ke bukai tauka “backlog”.
Nitihka graf pukul rata penyampau kes pemati ninting hari sepengelama tujuh hari, trend kes pemati pesakit COVID-19 ngayanka nurun seririh enggau penambah jumlah populasyen ke udah dituchuk vaksin sereta nerima siti dos vaksin.
