BETONG, 19 Sept: Pemereti ati mensia mayuh sentang pengerai dalam timpuh pandemik tu beguna amat lebih agi peranak di menua pesisir ba rumah panjai mesti bechek jampat taja bisi kelai ke enda raya.
Sapit Kepala Menteri Sarawak, Datuk Amar Douglas Uggah Embas madah, tu seriris enggau juluk perintah dikena nagang pengekai igi penyakit Covid-19 seraya ngalih ngagai fasa endemik.
“Aku ngelalau ngagai semua mesti bechek jampat enti bisi sakit baka tabin, batuk, pedis rekung nyengkaum nadai asai nyium utai,” ku iya.
Uggah ke mega Chairman Komiti Mutarka Penusah Ngenyit Nengeri (JPBN) Sarawak nambah, perubat tumu ulih nyelamatka nyawa sida enggau mantu ngurangka kes di ngaul ba rumah panjai enggau menua pesisir.
Ku iya madah, bepelasarka rikod kes nabanka nyawa kena Hari Enam di pelilioh Betong enggau Pusa ngayanka kes bisi kelai enggau nadai beperesa tumu.
“Kes pemati mega ngaul sida ti bisi penyakit baka obesiti, darah tinggi, ‘dyslipidemia’ enggau diabetes,” ku iya.
