SIBU, 19 Sept: Kes ninting hari ke tinggi ti dirikodka Sarawak mayuh ngaul kes Varian Delta.
Tu ngujungka Sarawak nyadi nengeri ke pemadu tinggi ngerikodka kes ninting hari di Malaysia.
Koordinator Komiti Mutarka Penusah Ngenyit Bagi Menua (JPBB) Sibu, Dr Annuar Rapaee madahka, kes Varian Delta tu majak nambah ketegal pengasi vaksin ke majak kurang ti ngujungka imuniti peranak nyau lemi.
“Kitai ngerikodka kes Varian Delta ke tinggi, ketegal pengasi vaksin nyau kurang sereta ngujungka imuniti tauka sistem pengetan tubuh peranak nyau lemi.
“Nya kebuah kitai begunaka tuchuk dos vaksin ‘booster’ tauka vaksin penyungkak,” ku iya madah.
Dr Annuar ke mega Menteri Muda Pengerai Mensia Mayuh enggau Pengawa Berumah nerangka, ungkup dos vaksin ‘booster’ bedau bisi penerang silik ti madahka penerima vaksin Pfizer deka nerima vaksin ke sama baka penerima vaksin Sinovac enggau AstraZeneca.
“Kitai bedau nemu sekalika bisi bida entara bansa vaksin ke diambi penerima,” ku iya nambah.
Kelimpah ari nya, Dr Annuar madahka penambah kes ninting hari deka dipelabaka ulih ngasuh pengeransing enggau pengiruh raban gawa di luan majak kurang laban sida chukup bebendar gawa ngelaban pengekai igi penyakit COVID-19.
“Enti ulih kitai anang mantaika sebarang pekara ke tau ngeruga sereta ngelemika pengeransing sida,” ku Dr Annuar madah agi.
