KABONG, 18 Sept: Perintah Nengeri chakah ngemansangka kandang menua Kabong nengah bemacham projek ti deka ngubah rampa menua nya dudi hari ila
Kepala Menteri, Datuk Patinggi Abang Johari Tun Openg madah, projek pemansang baru tu nyengkaum numbuhka sebuah opis pelilih enggau ngemansangka pasar baru Kabung.
Tu entara komited perintah deka ngangkatka tikas pengidup peranak ti ngembuan potensi ulih nyungkak ekonomi dalam bidang betanam betupi enggau sektor dagang temuai.
“Pekara keterubah, kitai ngemansangka Opis Pelilih Kabong ti begunaka ungkus kira-kira RM7 juta ti disikap enggau pekara ke patut ba opis tu dikena meri servis ke manah ngagai rayat,” ku iya ba aum media maya penemuai ngagai Kabong kena Hari Enam.
Abang Johari madah, penumbuh opis nya nangkup guna peminta peranak ti begunaka servis perintah seraya ngemudahka pengawa sida.
Kelimpah ari nya, entara projek pemansang ke bukai diperambu perintah iya nya ngaga pasar baru Kabong ti mungkur pemesai 27 ikar ti nyadi pelasar pedagang ngerembaika ekonomi dagang sida.
“Ketiga kitai deka ngaga balai mayuhguna ke baru ti ulih nampung 300 iku orang enggau ungkus belanja RM5.5 juta. Keempat iya nya ngaga masjid baru enggau nitihka guna komuniti ditu nyengkaum endur ngatur akad nikah,”ku iya nerang.
Ku iya madah, semua perambu projek pemansang tu disadang tembu digaga ba taun 2023.
Nangkanka nya, Abang Johari mega madahka penanggul bekal ai beresi ba kandang menua nya deka diputarka.
Perintah nengah Opis Entali Ai enggau Parit Sarawak merambu deka ngaga selapat bah dikena nagang tanah tusur ba endur bekebun di Sungai Seblak.
“Paip ai tu deka disambung ngagai Ulu Roban ti mungkur rumah panjai di Ulu Roban enggau ungkus belanja penyampau RM15 juta ti deka berengkah digaga ba taun baru enggau disadang tembu ujung taun. Tu mungkur liam buah rumah panjai ke bisi ba sitak Ulu Roban,” ku iya.
