SRI AMAN, 18 Sept: Penumbuh gerija Kristian ukai semina ulih ngembing pendiau pengidup mensia mayuh tang mega mai reti ke chukup besai ngagai sida ti megai pengarap nya dalam ngangkatka pemansang nengeri tu.
Tuai Gerija St Luke Simanggang, Venerable Archdeacon Jeckson Jarau madah, penumbuh institusi gerija mega mujur nyungkak pemansang pelajar nembiak.
Ku iya madah, mayuh alumni ari Sekula St. Paul tu udah nyulut nyengkaum Kepala Menteri ke lama, niang Dato Tawi Sli enggau orang ti gawa perintah ke bukai.
Dikena ngingatka ‘Diocesan Mission Sunday 2021’, Gerija St Luke Sri Aman udah ngatur sembiang ‘live streaming’ di Gerija St. Paul dikena ngingatka pengawa pengerembai pengarap kristian anglika kena 19 September 2021.
“Dalam kitai ngemesaika minggu mission tu, aku mai semua kitai meruan arap lalu bepegai rat ba pengarap kitai. Ukai mina niri, ngetan, ngemanahka gerija tang awak terus mansang, majak tebilang lalu nyadika lambang pengidup pengarap kitai nyadi orang kristian” ku iya bejaku maya sembiang ‘live streaming’ ti diatur di Gerija St. Paul kena Hari Lima.
Nangkan nya, Gerija St Luke deka ngatur sembiang beserimbai enggau ‘Diocesan Mission Sunday’ ba Gerija St Paul Banting kena Hari Minggu tu.
Tuju pengawa sembiang tu diatur dikena ngingatka penumbuh gerija ke-162 taun ari jeman Rajah James Brooke kelia.
Sama bisi ngulu sembiang maya tu iya nya Kepala Pengajar St. Paul., Mr Downey George, Reverend Rodriguez Unak, Layreader Ulong Rantai enggau boniface Manggie.
Ke rikod, ba taun 1851 pengarap kristian anglika dikerembai di Sarawak ti diuluka siku padri ari menua England, Rev Walter Chambers ari pinta Bishop Mcdougall enggau Rajah James Brooke .
Gerija St. Paul ti ngangatka nama rasul kena 17 July 1858 ti keterubah gerija luar Kuching ditumbuhka Walter Chambers alai iya ngerembaika pengarap kristian.
