MIRI, Sept 18 : Ninting taun, sekeda kandang endur ba tanah ti baruh tisi Sungai Lutong, Miri, napi penusah ampuh bah, kelebih agi lebuh ai pasang enggau ujan bangat.
Menteri ke nanggung pengawa Komiti Mutarka Penusah Ngenyit Bagi Miri (JPBB) Datuk Lee Kim Shin madah, penanggul nya tusah diputar laban pengawa meresi sekeda endur ba sungai lutong tusah dikereja.
Ku iya, pengatur Petronas Carigali Sdn Bhd dikearapka ulih sama gawa enggau ejensi ti bukai ngambika mutar penanggul nya enggau lengkas kelebih agi maya musin monsun ti deka datai enda lama agi.
Iya bejaku munyi nya nengah penerang media ba aum “Sarawak asset siltation issue of Lutong river” Di terminal minyak mentah miri (MCOT) kena hari Lima.
Apin lama ti udah, sekeda ejensi ti bekait udah mantaika perambu ungkup timpuh ti panjai sereta timpuh ti pandak dikena ngurangka risiko ampuh bah nyadi.
Entara penanggul ti ngujungka ampuh bah balat nyadi di mengeri nya ia nya isu tanah latak ti majak mayuh ba Sungai Lutong.
Berindik ari nya, pengawa matau udah digaga kilah ensana kena nentuka chara ti pemadu manah kena ngemutarka penanggul nya berindik ari gaya penusah ampuh bah ti nyadi bedau lama lalu ngeruga kandang endur menua dia.
Sama bisi enggau aum ia nya pemangku Residen Pelilih Miri Ke Mega Chairman JPBB Miri, Jamalie Busri, Sekretari Opis Menteri Perengka Pengangkut Sarawak, Datu Buckland Bangik, Kontroler Kualiti Rampa Menua Sarawak, Peggy Ronin Edin, Pegawai Kawalan Rampa Menua Kanan (tuai opis NREB Miri), Joseph Uyo, Asistan Kontroler Penerit Adat Gerempung Sungai-Sungai Sarawak Leftenan Kolonel Ding Tiew Wong, Injiner Kaunsil Mengeri Miri (MBM) Abdul Rahman Taupek enggau bala tuai bukai ari Petronas Carigali Sdn. Bhd. ke diuluka menejer besai Zubaidi Abang Zamharai sereta Shamsawi Ahmad.
