MUKAH, 17 Sept: Enam iku peranak Indonesia ditangkap ketegal ngembuan 17 senyata tiru mayuh guna ba sebuah rumah nadai lumur di Jalai Orang kaya Setiaraja Mukah maya hari lima.
Ku Tuai Polis Pelilih Mukah, DSP Mohamad Rizal Alias, enam iku peranak menua Indonesia nya nyengkaum lima iku lelaki enggau siku indu ti berumur entara 25 nyentuk ke 39 taun.
Semua sida tu ngembuan dokumen pejalai ke udah ambis timpuh sereta udah ditan Opis Imigresen Malaysia urung pukul 3.05 pagi.
Ku iya madah, kelimpah ari senyata tiru , 24 leka peluru bul plastik enggau jel ti dikena sida main “paintball” lalu dua kerita mega dirampas.
“Semua barang ke dirampas tu dipelabaka beungkus kira-kira RM40,000.
Rizal madahka, tasat keterubah tetemuka saspek madahka senyata tiru sereta leka peluru tiru nya dijual ngagai siku orang ke bedagang aktiviti betimbak tauka paintball, tang puntan ketegal Atur Nagang Pemindah (PKP)
Nangkanka nya, ku iya madah agi, semua senyata tu dibai belalai ari menua indon.
“Semua saspek enggau barang ke dirampas ditangkap sereta ditasat,” ku iya madah agi.
Kes ditasat ba baruh Seksyen 36 (1) Akta Senjata Api 1960 enggau Akta Imigresen 1959/1963.
Tu nyengkaum nadai dokumen pejalai ke sah sereta dokumen udah ambis timpuh.
