KUCHING, 18 Sept: ‘Dine-in’ tauka makai ba kedai dikemendarka ba bagi menua selatan Sarawak berengkah 20 September 2021 tu.
Taja pan pia, anak mit beumur 12 taun ke baruh agi enda dikemendarka pansut tauka ngelawa palan mensia mayuh, palan ke sekut enggau makai ba kedai.
Komiti Mutarka Penusah Ngenyit (JPBN) Sarawak madahka, pemindah anak mit agi ditagang ba serata Sarawak baka sebedau tu ba baruh Pelin Mulaika Pemanah Menua (PPN) sereta nyengkaum raban rentan ke bisi risiko dirampit COVID-19.
“Anak mit ba baruh umur 12 taun bedau nerima vaksin lalu tu ngujungka sida mudah dirampit penyakit COVID-19, tebal agi Varian Delta ke jampat agi ngekai ba serata nengeri tu,” ku JPBNS madah.
Kena 17 Ogos ke udah, Penyanding Penemu JPBN Sarawak Datuk Seri Dr Sim kui Hian mantaika pengirau ati iya senentang mayuh anak mit dirampit Varian Delta ti dibanding lebuh maya pandemik.
Iya madahka, bisi 832 iku anak mit ba baruh umur enam taun dirampit COVID-19 entara 1 nyentuk ke 12 Ogos, seraya 773 kes ngaul anak mit ke beumur tujuh nyentuk ke 12 taun sereta 673 kes ngaul nembiak ke beumur 13 nyentuk ke 17 taun.
Dr Sim ke mega Menteri Kaunsil Kandang Menua enggau Pengawa Berumah madahka, taja pan anak mit enggau nembiak semina kelai ke enda berat tang, mayuh sebengkah pekara ke enda ditemu bekaul enggau COVID-19 ba dalam timpuh ke panjai ulih nyadi ba sida ti nyerangkung Sindrom Kembai Multisistem ba anak mit (MIS-C), tauka Sindrom Multisistem Kembai Pediatrik (PIMS).
Kelimpah ari nya, Perunding Pakar Kardiologi Pediatrik Prof Madya Dr Norazah Zahari ari Palan Perubat Universiti Malaya madahka, anak mit entara raban ke mudah dirampit COVID-19, tebal agi lebuh sida bedau nerima tuchuk vaksin ba renggat pandemik.
