KUCHING: Perintah Sarawak deka ngemeratka rambai jaku “Keluarga Malaysia” ba dalam pengawa berunding senentang kuasa ngempu nengeri enggau perintah besai.
Kepala Menteri Datuk Patinggi Abang Johari Tun Openg nyemetak madahka, penumbuh menua Malaysia ti nyerangkung tiga kandang menua mesti sama bebasaka pangan diri seraya ngaku kuasa ngempu ke udah ditetapka ba baruh Perlembagaan Malaysia tauka Konstitusyen Perintah Besai sereta Sempekat Malaysia 1963 (MA63).
Ku Abang Johari madah, taja pan Malaysia 58 taun udah ditumbuhka, tang agi bisi sekeda pekara ke bedau dipejalaika ba baruh Konstitusyen Perintah Besai enggau MA63 ke mesti terus diperundingka entara kedua-dua perintah.
“Perintah Besai enggau perintah nengeri udah berunding kenyau ari taun 2015 lalu pengawa tu deka diteruska. Aku arapka inisiatif deka terus berunding senentang MA63 baka ke udah ditetapka ba dalam Memorandum Pemereti Ati Transformasyen Penegap Politik (MOU) entara Perintah Besai enggau penyakal (Pakatan Harapan) maya 13 September ke udah ti deka mai asil ke menang-menang entara kedua-dua perintah,” ku iya madah ba pengerami Hari Malaysia 2021 renggat nengeri ba Dewan Kunsil Nengeri (DUN) Sarawak maya hari Empat.
Kelimpah ari nya, beserimbai enggau Hari Malaysia taun tu, iya arapka “Keluarga Malaysia’ ke nyerangkung Semenanjung Malaysia, Sarawak enggau Sabah deka terus ditegutka agi dikena nyapai penegap sereta pemansang menua.
“Aku ke nyadi Tuai Perintah Sarawak ke meri jamin senentang perintah Sarawak deka terus nuntut tauka minta pulai kuasa ngempu Sarawak ke bedau dipejalaika sebedau tu nengah pengawa berunding enggau Perintah Besai,”
Kepala Menteri mega beterima kasih ngagai Menteri Besai Datuk Seri Ismail Sabri Yaakob ke mandangka perati iya senentang aspirasyen rayat di Sarawak.
