KOTA KINABALU, 16 Sept: Perintah besai ngungkupka sepenyampau RM7.7 bilion nengah Pelan Jalinan Digital Negara (JENDELA) dikena Sabah enggau Sarawak ngalih ngagai teknologi 5G.
Menteri Besai, Datuk Seri Ismail Sabri Yaakob madah, nengah agih belanja ungkup timpuh lima taun nya, penyampau RM3.61 bilion deka diberi ngagai Sabah enggau RM4.09 bilion enggi Sarawak.
Iya madahka JENDELA besemaya deka meri akses bungkur internet ke manah enggau dikemesai ke pemaik rayat lebih agi di Sabah enggau Sarawak.
“Perintah nemu kuasa bempu enggau ke guna ‘Keluarga Malaysia’ dekaka akses internet ke jauh manah. Dikena nyapai juluk tu, JENDELA 2021 nyentuk 2025 deka dikemesaika agi,” ku iya maya bejaku ba Pengerami Hari Malaysia 2021 malam tadi.
Sama bisi datai iya nya Yang Dipertua Negeri Sabah Tun Juhar Mahiruddin, Kepala Menteri Sabah Datuk Hajiji Noor, Sapit Kepala Menteri Sarawak Datuk Amar Awang Tengah Ali Hasan, Sapit Kepala Menteri Sabah Datuk Seri Bung Moktar Radin, Menteri Komunikasyen enggau Multimedia Tan Sri Annuar Musa sereta Menteri ba Opis Menteri Besai (Pekara Sabah enggau Sarawak) Datuk Seri Dr Maximus Ongkili.
Ismail Sabri ngarap servis nya deka meri pemaik ngagai 3.8 juta iku rayat di Sabah enggau 2.8 juta iku rayat di Sarawak.
“Ngarapka pengudah tu nadai agi kitai ninga bisi ‘Keluarga Malaysia’ ti niki pun kayu tauka atap rumah begigaka bungkur internet dudi hari ila.
“Aku jamin, perintah deka naka ulih ngemanahka servis bungkur internet ba kedua-dua nengeri tu. Nadai siku pan ditinggal, semua deka bisi akses ngagai dunya digital enggau bela ulih bekangau enggau pangan diri,” ku iya.
