KOTA KINABALU: Perintah besai nengah Kaunsil Khas Sempekat Malaysia 1963 (MA63) besemaya deka meri perati senentang isu ke bekaul enggau peminta Sabah enggau Sarawak.
Ngambi ripot ari Bernama, Menteri Besai Datuk Seri Ismail Sabri Yaakob madahka, iya meri jamin perintah besai deka ngaluska sekeda pekara ke mesti diperundingka nengah Kaunsil Khas MA63 ti dichairmanka iya empu sereta disereta Kepala Menteri Sabah, Kepala Menteri Sarawak enggau lapan iku Menteri ba renggat Perintah Besai.
“Pengawa tu mandangka perintah bekenanas meri perati isu ke ngaul mayuh macham pekara ke beguna ungkup nengeri Sabah enggau Sarawak,” ku iya madah lebuh bejaku ba Pengerami Hari Malaysia 2021 maya hari Empat.
Ismail Sabri madahka, tetiap iku rayat Malaysia mesti beterima kasih lebuh tetiap pemar ke ditapi ulih ditempuh bepelasarka langkar pengawa toleransi enggau demokratik seraya belalauka konstitusyen perintah besai sereta undang-undang.
“Malaysia ti ditumbuhka kena 16 September 1963 nengah Sempekat melalui Malaysia (MA63), agi tegap ti nyadika menua tu seruran likun, merdeka enggau berdaulat ba baruh Yang di-Pertuan Agong Al-Sultan Abdullah Ri’ayatuddin Al-Mustafa Billah Shah ke nyadi Payung Penyerakup Menua,” ku iya madah.
