KUCHING: Mayuh pemujur udah dijapai Sarawak senentang pengawa minta pulai kuasa ngempu nengeri ke enda dipejalaika sebedau tu sekalika sengaja tauka enda ari perintah besai.
Kepala Menteri Datuk Patinggi Abang Johari Tun Openg lebuh bekunsika sekeda ari pemujur nya madahka, senentang Royalti Minyak enggau Bayar Mata Duit (Oil Royalty & Cash Payment) ba taun 2019, siti Komiti Begulai entara Perintah Besai, Sarawak enggau Sabah udah ditumbuhka sereta dichairmanka Menteri Pekara Wang enggau Menteri Kanan Kereja Raya baum senentang pekara ke dituntut nengeri Sarawak enggau Sabah bekaul minyak enggau gis ti diputarka nguna chara komersial enda nengah proses undang-undang.
“Sepengudah setaun pengawa berunding dipejalaika entara nengeri enggau PETRONAS, kena 7 Disember 2020, Sempekat Mutarka Chara Komersial tauka CSA mujur disain entara nengeri Sarawak enggau PETRONAS.
“Naka ke diatu, penetap ba baruh sempekat nya udah dipejalaika Sarawak enggau PETRONAS ke alai kuasa Sarawak ba dalam industri minyak enggau gis ba darat enggau luar pantai Sarawak diambi kira. Ba pekara nya, penyereta Sarawak ba pengawa nya nengah PETROS udah disain enggau PETRONAS,” ku iya madah ba pengerami Hari Malaysia 2021 renggat nengeri ba Dewan Kunsil Nengeri (DUN) Sarawak maya hari Empat.
Berebak ari nya, iya nerangka senentang pengawa ngidar gis (Gas Distribution), perintah besai udah setuju enggau peminta perintah Sarawak enda ibuh minta pemendar ba baruh Akta Kemajuan Petroleum 1974 (Akta 144) enggau lisin ba baruh Akta Kawalan Bekalan 1961 (Akta 122) lebuh bejalaika aktiviti ngidar gis di Sarawak.
“Pemberitahuan Pengecualian (Ubah) 2021 ba baruh Akta Kemajuan Petroleum 1974 [Akta 144] enggau Perintah Kawalan Bekalan (Pengecualian) 2021 ba baruh Akta Kawalan Bekalan 1961 (Akta 122) udah digaga enggau digazet sereta diteritka ba pun ari 1 Jun 2021.
“Kena 9 September ke udah, pengerami Nyerahka Surat Enda Disengkaum Pengawa Ngemataka LPG Nengeri Sarawak udah diatur ke alai Menteri Pengawa Dagang Dalam Menua enggau Pekara Bebelika Barang, Datuk Seri Alexander Nanta Linggi udah nyerahka surat nya ngagai perintah nengeri,” ku Abang Johari madah.
Nangkan ke nya, lebuh madahka senentang rampa menua, iya madahka senentang kuasa ngatur rampa menua, perintah Besai udah setuju meri kuasa baka ke ditetapka ba Akta Kawalan Kualiti Alam Sekitar (1974) ngagai pegawai Kaunsil Pengeraja Asal enggau Rampa Menua Sarawak (NREB) bejalaika operasyen Ordinan Pengeraja Asal enggau Rampa Menua (Ubah) 2019.
“NREB enggau Opis Menteri Rampa Menua deka nentuka chara bejalaika pengawa mindahka kuasa nya,” ku iya madah agi.
