KUCHING, 17 Sept: Perintah besai benung berundingka isu kurang fasiliti pengerai enggau pakar perubat di Sabah enggau Sarawak.
Sapit Menteri Pengerai, Datuk Aaron Ago Dagang madah, mayuh ‘projek sakit’ perintah di Sabah enggau Sarawak ti ngaul projek ngaga sepital sereta klinik pengerai napi penanggul enda tembu digaga nitihka timpuh ti udah ditetapka.
“Perintah benung beratika pekara tu enggau deka ngemanahka agi fasiliti pengerai di Sarawak enggau Sabah lebih agi dikena nentuka projek ngaga sepital baru enggau klinik pengerai ditembuka jampat,” ku iya maya ngelawa Sepital bau kena Hari Lima.
Iya ke mega Kaban Parlimen Kanowit madah, entara projek sepital baru ke bedau tembu digaga di Sarawak iya nya Sepital Petra Jaya, Sepital Sri Aman, Sepital Lawas enggau Sepital Miri.
Nengeri Sarawak enggau Sabah endang begunaka amat sepital tambah enggau klinik pengerai berindik ari rayat di kedua-dua nengeri tu majak nambah sereta klinik pengerai ke bisi udah enda ulih nampung pesakit.
Senentang isu kurang pegawai enggau pakar perubat, Aaron nerang, perintah udah nyiri pegawai perubat kunterik dikena mutarka pekara nya.
Pekara tu nyadi ketegal pakar perubat di Sabah enggau Sarawak pindah ngagai menua luar.
Ku iya madah, enti nitihka nisbah populasyen, Sarawak begunaka 1,800 iku pakar perubat dalam mayuh macham bidang di sepital perintah, tang maya diatu semina bisi 532 iku aja diengkah di nengeri tu.
“Diatu bisi perambu deka mai pakar chara kunterik ari menua luar tang pekara tu agi ba renggat diperundingka perintah laban ungkus gaji besai,”ku iya.
