KUCHING: Penyerakup rayat pupu bansa di Malaysia ulih disemaka baka ai Teh C Special Sarawak.
Tetiap lapis ba dalam ai nya ngembuan pemanis kediri empu lalu enti digulai sekali ngasuh asai ai nya lebih nyamai agi.
Pekara nya dipadahka Sapit Kepala Menteri Tan Sri Dr James Jemut Masing nengah siti video ti dikunsika ba laman Facebook iya beserimbai enggau pengerami Hari Malaysia 2021.
Beduduk ari nya, iya meransang ngambika tetiap iku rayat di menua tu terus beserakup sereta begempung ngemansangka menua, tebal agi ari sukut ekonomi ke mantu ngubah tikas pengidup sida.
“Aram kitai sama ngemansangka tanah kitai laban tu sebagi ari hak kitai.
“Ari tu kitai ulih nambahka asil penatai pemisi ke tau ngubah pengidup kitai lebih manah agi,” ku iya madah.
Kelimpah ari nya, Masing ke mega Menteri Infrastrakcha enggau Pemansang Penyangkai Kapal madahka, genap iku rayat di menua tu mesti besaup ngetanka menua awakka seruran likun nyentuk ke jemah ila.
Iya mega ngarapka rayat pupu bansa terus bebasaka pangan diri. besukung sereta begempung ngereja sebarang pengawa ke berat ngambika pengawa nya tau lempung.
“Kitai mesti begulai manah, bebasaka pangan diri sereta sayau ke pangan diri laban tu meh tanda semua kitai sayau ke menua,” ku iya madah agi.
